O‘zbekiston Madaniyat va san’atni rivojlantirish jamg‘armasi va The King’s Foundation School of Traditional Arts (KFSTA) hamkorlik boshlanganini hamda Toshkentda “Naqsh” hunarmandchilik maktabi ochilishini e’lon qildi. Loyiha qadimiy hunarlarni asrash, rivojlantirish va ularni yangi avlodlarga yetkazish yo‘lidagi muhim qadamdir.
Islom sivilizatsiyasi markazida joylashgan “Naqsh” hunarmandchilik maktabi o‘zbek ustalari hamda KFSTA xalqaro mutaxassislari tajribasini birlashtiradi. KFSTA — butun dunyoda an’anaviy san’atlarni qo‘llab-quvvatlash maqsadida Buyuk Britaniya qiroli Charlz III tomonidan asos solingan ta’lim muassasasi. Dastlabki yilda beshta kurs rejalashtirilgan: birinchisi Toshkentda boshlangan bo‘lib, tez orada Samarqandda davom etadi. Talabalar bu yerda XV asr Ulug‘bek madrasasining bezak va me’moriy uslublarini o‘rganadilar.
Ushbu maktab ochilishi — uyg‘onish va davomiylik timsoli. U qadimiy hunarlarni yangi hayot bilan bog‘lab, merosdan ilhom olgan ijod orqali o‘tmish va bugunni birlashtiradi.